Elchixona ma’lumotiga ko‘ra, 2025 yil davomida Xorvatiya va Serbiyada ishlayotgan o‘zbekistonliklardan ish haqi to‘lanmasligi yoki kechiktirilishi, yashash va ishlash ruxsatnomalari bilan bog‘liq muammolar, hujjatlarni rasmiylashtirishda asossiz qo‘shimcha to‘lovlar undirilishi kabi holatlar yuzasidan murojaatlar kelib tushgan. Shuningdek, ayrim ish beruvchilar ishni rad etgan taqdirda deportatsiya bilan tahdid qilayotgani qayd etilgan.
Elchixona ko‘plab muammolar nolegal vositachilar orqali chet elga chiqish va ishga joylashish oqibatida kelib chiqayotganini bildirgan. Shu sababli fuqarolarga faqat Kambag‘allikni qisqartirish va bandlik vazirligi huzuridagi Tashqi mehnat migratsiyasi agentligi litsenziyasiga ega xususiy bandlik agentliklari orqali ishga chiqish tavsiya etilmogda.
Shuningdek, litsenziyaga ega bo‘lmagan shaxslarga pul o‘tkazmaslik, ishchi bo‘lmagan vizalar bilan noqonuniy ishlamaslik, mehnat shartnomasini imzolashdan avval uni tushunarli tilda tarjima qildirib, shartlarni diqqat bilan o‘rganish zarurligi eslatildi. Muammolar yuzaga kelganda elchixona konsullik bo‘limiga murojaat qilish so‘ralgan.
