Элчихона маълумотига кўра, 2025 йил давомида Хорватия ва Сербияда ишлаётган ўзбекистонликлардан иш ҳақи тўланмаслиги ёки кечиктирилиши, яшаш ва ишлаш рухсатномалари билан боғлиқ муаммолар, ҳужжатларни расмийлаштиришда асоссиз қўшимча тўловлар ундирилиши каби ҳолатлар юзасидан мурожаатлар келиб тушган. Шунингдек, айрим иш берувчилар ишни рад этган тақдирда депортация билан таҳдид қилаётгани қайд этилган.
Элчихона кўплаб муаммолар нолегал воситачилар орқали чет элга чиқиш ва ишга жойлашиш оқибатида келиб чиқаётганини билдирган. Шу сабабли фуқароларга фақат Камбағалликни қисқартириш ва бандлик вазирлиги ҳузуридаги Ташқи меҳнат миграцияси агентлиги лицензиясига эга хусусий бандлик агентликлари орқали ишга чиқиш тавсия этилмоқда.
Шунингдек, лицензияга эга бўлмаган шахсларга пул ўтказмаслик, ишчи бўлмаган визалар билан ноқонуний ишламаслик, меҳнат шартномасини имзолашдан аввал уни тушунарли тилда таржима қилдириб, шартларни диққат билан ўрганиш зарурлиги эслатилди. Муаммолар юзага келганда элчихона консуллик бўлимига мурожаат қилиш сўралган.
