2026–2030 yillarda sohada yangi moliyaviy va boshqaruv modeli joriy etilishi rejalashtirilmoqda.
Prezident Shavkat Mirziyoyev 14 yanvar kuni ko‘p kvartirali uy-joy fondini boshqarish tizimini yanada takomillashtirish hamda aholiga ko‘rsatilayotgan xizmatlar sifatini oshirishga qaratilgan takliflar taqdimoti bilan tanishdi.
Qayd etilishicha, bugungi kunda O‘zbekistonda 44 mingdan ortiq ko‘p kvartirali uylarda 7,1 million nafar aholi istiqomat qiladi. Ularga 900 dan ziyod boshqaruv servis kompaniyalari, 200 dan ortiq shirkatlar xizmat ko‘rsatmoqda, 856 ta uyda esa o‘zini o‘zi boshqarish tizimi joriy etilgan.
So‘nggi yillarda ko‘p qavatli uylar va ularga tutash hududlarni obodonlashtirish, umumiy mulkni ta’mirlash hamda muhandislik kommunikatsiyalarini yangilash bo‘yicha muayyan ishlar amalga oshirilgan. Biroq boshqaruv kompaniyalari faoliyatining barqarorligi va samaradorligini oshirish, xizmatlar turini kengaytirish dolzarb bo‘lib qolmoqda.
Shu munosabat bilan 2026–2030 yillarda ayrim shahar va tumanlarda ko‘p xonadonli uylarni boshqarishning klaster tizimini huquqiy eksperiment sifatida joriy etish taklif qilindi. Eksperiment doirasida uylar holati tahlii qilinib, “yashil”, “sariq” va “qizil” toifalarga ajratiladi, kamida 7 ming xonadondan iborat lotlar shakllantiriladi va 5 yillik rivojlanish dasturlari ishlab chiqiladi.
Boshqaruvchi tashkilotlar “Mening uyim” axborot tizimi orqali mulkdorlar ovozlari bilan tanlanadi. Majburiy badallar va barcha qo‘shimcha daromadlar aynan shu tizim orqali hisobga olinadi. Hisobotlar o‘z vaqtida kiritilmagan taqdirda, majburiy badallarni hisoblash vaqtincha to‘xtatiladi.
Shuningdek, “Turar-joy” milliy axborot tizimini bosqichma-bosqich ishga tushirish, sohani raqamlashtirish va dispetcherlik xizmatlarida sun’iy intellekt texnologiyalarini joriy etish rejalashtirilmoqda.
Davlat rahbari mas’ullarga qisqa muddatda sohaning sarmoya jozibadorligini oshirish, uy-joy mulkdorlari va boshqaruv servis kompaniyalari uchun manfaatti, shaffof va iqtisodiy jihatdan barqaror tizim yaratish bo‘yicha topshiriqlar berdi.
