Bugun, 26 yanvar kuni Toshkent shahridagi "Chorsu" bozorida yong‘in sodir bo‘ldi, deya xabar berdi poytaxt Favqulodda vaziyatlar bosh boshqarmasi.
Ma’lum qilinishicha, soat 16:04 da Shayxontohur tumani Beruniy ko‘chasida joylashgan "Chorsu" bozorida do‘kon yonayotgani haqida xabar kelib tushgan.
Qutqaruv ekipajlari voqea joyiga 16:08 da yetib borib, yong‘in 16:20 da qurshab olingan va 16:25 da to‘liq o‘chirilgan.
Qayd etilishicha, hodisa oqibatida tan jarohati olganlar yo‘q. Yong‘in natijasida do‘kon yertolasiining taxminan 15 kvadrat metr maydoni zarar ko‘rgan.
