Saxalin viloyatida jazo o'tayotgan bir guruh o'zbekistonlik mahbuslar jazoning qolgan qismini vatanda o'tash istagini bildirdi. Bu masala O'zbekistonning Vladivostokdagi Bosh konsulxonasi xodimlarining xizmat safari davomida ko'rib chiqildi.
Diplomatlar 1-sonli jazoni ijro etish muassasasiga borib, u yerdagi 11 nafar O'zbekiston fuqarosi bilan uchrashdi. Ulardagi yashash sharoiti o'rganildi, shuningdek, zo'ravonlik yoki majburiy mehnat holatlari mavjud emasligi aniqlandi.
Shu bilan birga, mahbuslar Rossiya Mudofaa vazirligi vakillari tomonidan harbiy harakatlarda qatnashish evaziga jazodan ozod qilish va yuqori maosh taklif etilayotgani haqida ma'lum qilishdi. Diplomatlar esa O'zbekiston fuqarolarini bunday takliflar qonunga zid ekani va "yollanish" jinoiy javobgarlikka sabab bo'lishi haqida ogohlantirdi.
Mahbuslar jazoning qolgan qismini O'zbekistonda o'tash istagini bildirgan, biroq hozircha ikki davlat o'rtasida mahkumlarni o'zaro topshirish bo'yicha kelishuv mavjud emasligi ma'lum qilindi.
