Сахалин вилоятида жазо ўтаётган бир гуруҳ ўзбекистонлик маҳбуслар жазонинг қолган қисмини ватанда ўташ истагини билдирди. Бу масала Ўзбекистоннинг Владивостокдаги Бош консулхонаси ходимларининг хизмат сафари давомида кўриб чиқилди.
Дипломатлар 1-сонли жазони ижро этиш муассасасига бориб, у ердаги 11 нафар Ўзбекистон фуқароси билан учрашди. Улардаги яшаш шароити ўрганилди, шунингдек, зўравонлик ёки мажбурий меҳнат ҳолатлари мавжуд эмаслиги аниқланди.
Шу билан бирга, маҳбуслар Россия Мудофаа вазирлиги вакиллари томонидан ҳарбий ҳаракатларда қатнашиш эвазига жазодан озод қилиш ва юқори маош таклиф этилаётгани ҳақида маълум қилишди. Дипломатлар эса Ўзбекистон фуқароларини бундай таклифлар қонунга зид экани ва "ёлланиш" жиноий жавобгарликка сабаб бўлиши ҳақида огоҳлантирди.
Маҳбуслар жазонинг қолган қисмини Ўзбекистонда ўташ истагини билдирган, бироқ ҳозирча икки давлат ўртасида маҳкумларни ўзаро топшириш бўйича келишув мавжуд эмаслиги маълум қилинди.
