Ma'lum qilinishicha, Samarqand viloyati Urgut tumanida tug'ilgan V.A. Niderlandiyada qurilish sohasida ishlab yurgan vaqtida o'tkir tish infektsiyasiga chalingan. U o'z vaqtida malakali tibbiy yordamga murojaat qilmagani oqibatida og'ir yallig'lanish yuzaga kelib, sog'lig'ida jiddiy asoratlar paydo bo'lgan.
Fuqaro Bryussel shahri orqali O'zbekistonga qaytish vaqtida uning ahvoli keskin yomonlashgan. Shundan so'ng u zudlik bilan Bryusseldagi Sent-Lyuk universitet klinikasiga yotqizilgan. Shifokorlar bemor ahvolini o'ta og'ir deb baholagan.
Klinika mutaxassislari tomonidan ikki marta murakkab jarrohlik amaliyoti o'tkazilgan. Bemor uzoq vaqt sun'iy nafs oldirish apparatiga ulangan holda jonlantirish bo'limida yotgan.
Xabarga ko'ra, fuqaro shifoxonaga yotqizilgan paytdan boshlab O'zbekiston elchixonasi xodimlari shifokorlar, klinika ma'muriyati va bemor qarindoshlari bilan doimiy aloqada bo'lgan. Elchixona tomonidan zarur konsullik va tashkiliy ishlar amalga oshirilgan.
“Belgiya shifokorlari va o'zbek diplomatlarining hamkorlikdagi sa'y-harakatlari tufayli fuqaroning hayoti saqlab qolindi”, deyiladi xabarda.
Ayni paytda V.A. O'zbekistonda bo'lib, oilasi bag'rida davolanish va sog'lig'ini tiklashni davom ettirmoqda.
