O'zbekiston Jahon savdo tashkilotiga a'zo bo'lish jarayoni doirasida bozorga kirish masalasi bo'yicha Hindiston bilan muzokaralarni yakunlash to'g'risidagi bayonnomani imzoladi. Bu haqda prezidentning JST masalalari bo'yicha vakili, bosh muzokarachi Azizbek O'runov LinkedIn sahifasida ma'lum qildi.
Uning ta'kidlashicha, Hindiston bilan kelishuvlarga 2024 yilda erishilgan bo'lsa-da, hujjat matnini texnik jihatdan kelishtirish va yakuniylashtirish uchun qo'shimcha ishlar amalga oshirilgan.
“Hindiston tomoni bozorga kirish masalasida konstruktiv yondashuv ko'rsatdi”, — dedi u.
Shuningdek, Azizbek O'runov ushbu jarayonda O'zbekistonning Hindistondagi elchixonasi va Hindistonning O'zbekistondagi elchixonasi faol ishtirok etganini alohida qayd etdi.
Avvalroq 2026 yil fevral oyida muzokarachi ayrim davlatlar hujjatlarni ko'rib chiqishni kechiktirayotgani sababli JSTga a'zo bo'lish muddati orqaga surilishi mumkinligini aytgan edi. Biroq agar barcha qarorlar faqat O'zbekistonga bog'liq bo'lganida, mamlakat mart oyidayoq tashkilotga qo'shilishga tayyor bo'lardi.
Prezident Shavkat Mirziyoev 6 may kuni JSTga a'zo bo'lish jarayonini 2026 yilda yakuniylashtirish bo'yicha topshiriq bergan.
