Ўзбекистон Жаҳон савдо ташкилотига аъзо бўлиш жараёни доирасида бозорга кириш масаласи бўйича Ҳиндистон билан музокараларни якунлаш тўғрисидаги баённомани имзолади. Бу ҳақда президентнинг ЖСТ масалалари бўйича вакили, бош музокарачи Азизбек Ўрунов LinkedIn саҳифасида маълум қилди.
Унинг таъкидлашича, Ҳиндистон билан келишувларга 2024 йилда эришилган бўлса-да, ҳужжат матнини техник жиҳатдан келиштириш ва якунийлаштириш учун қўшимча ишлар амалга оширилган.
“Ҳиндистон томони бозорга кириш масаласида конструктив ёндашув кўрсатди”, — деди у.
Шунингдек, Азизбек Ўрунов ушбу жараёнда Ўзбекистоннинг Ҳиндистондаги элчихонаси ва Ҳиндистоннинг Ўзбекистондаги элчихонаси фаол иштирок этганини алоҳида қайд этди.
Аввалроқ 2026 йил февраль ойида музокарачи айрим давлатлар ҳужжатларни кўриб чиқишни кечиктираётгани сабабли ЖСТга аъзо бўлиш муддати орқага сурилиши мумкинлигини айтган эди. Бироқ агар барча қарорлар фақат Ўзбекистонга боғлиқ бўлганида, мамлакат март ойидаёқ ташкилотга қўшилишга тайёр бўларди.
Президент Шавкат Мирзиёев 6 май куни ЖСТга аъзо бўлиш жараёнини 2026 йилда якунийлаштириш бўйича топшириқ берган.
