Tadbir doirasida yil davomida eng yaxshi natija ko‘rsatgan ijodkorlarning badiiy kechasi o‘tkaziladi va ular munosib taqdirlanadi.
Jumladan, musiqa sohasida kamida 10 ta qo‘shiq yoki asar yaratgan, xalq artisti yoki xizmat ko‘rsatgan artist unvoniga ega bo‘lgan, xalqaro tanlovlar g‘oliblari va ijod namunalari keng ijro etilayotgan ijodkorlar; shuningdek, adabiyot sohasida yuksak e’tirofga sazovor bo‘lgan, 50 ming nusxadan ziyod nashr etilgan asar mualliflari, ijodi teatr va kinoda sahnalashtirilgan, she’rlari “hit” qo‘shiqqa aylangan ijodkorlar taqdirlanadi.
Ularga yil davomida har oy 5 million so‘m qalam haqi to‘lanadi, O‘zbekiston bo‘ylab transport vositalaridan bepul foydalanish imkoniyati beriladi. Shuningdek, ixtisoslashtirilgan tibbiyot markazlarida davolanish xarajatlari to‘liq davlat hisobidan qoplanadi. Ular uchun mahorat maktablari va ijod uylari tashkil etiladi.
Shuningdek, sovrindorlar keyingi yillarda ham ijodni davom ettirsa, ushbu imtiyozlardan foydalanishda davom etadi.
