Tashkilot ma’lumotlariga ko‘ra, tadbirda dunyoning 170 dan ortiq davlatidan vazirlar, rasmiylar va xalqaro ekspertlar ishtirok etmoqda.
Joriy yil aprel oyida O‘zbekiston mazkur komissiyaga ilk bor a’zo bo‘lgan edi. Sessiya doirasida Prezident Administratsiyasi rahbari Saida Mirziyoyeva boshchiligidagi O‘zbekiston delegatsiyasi milliy ma’ruza bilan ishtirok etdi.
Ma’lum qilinishicha, ma’ruzada mamlakatda jinoyatchilik profilaktikasi, odil sudlov tizimi, xotin-qizlar va bolalar huquqlarini himoya qilish hamda yoshlarni qo‘llab-quvvatlash sohasida amalga oshirilayotgan ishlar haqida axborot berilgan.
Saida Mirziyoyeva o‘z nutqida kiberjinoyatchilik, korrupsiya va oilaviy zo‘ravonlik kabi tahdidlarga qarshi kurashishda xalqaro hamkorlik muhim ahamiyat kasb etishini ta’kidlagan.
Sessiya doirasida O‘zbekiston delegatsiyasining Avstriya parlamenti rahbariyati bilan ham uchrashuvlari bo‘lib o‘tdi. Xususan, Avstriya Federal kengashi raisi Markus Shtotter hamda Milliy kengash raisi Valter Rozenkrans bilan muloqotlarda ikki tomonlama munosabatlarning bugungi holati va istiqbollari muhokama qilingan.
Shuningdek, Saida Mirziyoyeva BMT Bosh kotibi o‘rinbosari hamda BMTning Giyohvand moddalar va jinoyatchilik bo‘yicha boshqarmasi ijrochi direktori Monika Juma bilan uchrashdi.
Tomonlar O‘zbekiston va BMTning mazkur tuzilmasi o‘rtasidagi hamkorlik, giyohvandlik tahdidlariga qarshi kurashish hamda bu borada amalga oshirilayotgan qo‘shma loyihalar yuzasidan fikr almashdi.
Uchrashuvda xavfsizlik, adolat va barqaror taraqqiyot sohalaridagi hamkorlikni yanada kengaytirish masalalari ham ko‘rib chiqildi.
