Ташкилот маълумотларига кўра, тадбирда дунёнинг 170 дан ортиқ давлатидан вазирлар, расмийлар ва халқаро экспертлар иштирок этмоқда.
Жорий йил апрель ойида Ўзбекистон мазкур комиссияга илк бор аъзо бўлган эди. Сессия доирасида Президент Администрацияси раҳбари Саида Мирзиёева бошчилигидаги Ўзбекистон делегацияси миллий маъруза билан иштирок этди.
Маълум қилинишича, маърузада мамлакатда жиноятчилик профилактикаси, одил судлов тизими, хотин-қизлар ва болалар ҳуқуқларини ҳимоя қилиш ҳамда ёшларни қўллаб-қувватлаш соҳасида амалга оширилаётган ишлар ҳақида ахборот берилган.
Саида Мирзиёева ўз нутқида кибержиноятчилик, коррупция ва оилавий зўравонлик каби таҳдидларга қарши курашишда халқаро ҳамкорлик муҳим аҳамият касб этишини таъкидлаган.
Сессия доирасида Ўзбекистон делегациясининг Австрия парламенти раҳбарияти билан ҳам учрашувлари бўлиб ўтди. Хусусан, Австрия Федерал кенгаши раиси Маркус Штоттер ҳамда Миллий кенгаш раиси Вальтер Розенкранц билан мулоқотларда икки томонлама муносабатларнинг бугунги ҳолати ва истиқболлари муҳокама қилинган.
Шунингдек, Саида Мирзиёева БМТ Бош котиби ўринбосари ҳамда БМТнинг Гиёҳванд моддалар ва жиноятчилик бўйича бошқармаси ижрочи директори Моника Жума билан учрашди.
Томонлар Ўзбекистон ва БМТнинг мазкур тузилмаси ўртасидаги ҳамкорлик, гиёҳвандлик таҳдидларига қарши курашиш ҳамда бу борада амалга оширилаётган қўшма лойиҳалар юзасидан фикр алмашди.
Учрашувда хавфсизлик, адолат ва барқарор тараққиёт соҳаларидаги ҳамкорликни янада кенгайтириш масалалари ҳам кўриб чиқилди.
