O'zbekistonning Istanbul shahridagi Bosh konsulxonasi Turkiyada 29 yoshli O'zbekiston fuqarosi vafot etgani haqida ma'lum qildi.
Ma'lum qilinishicha, joriy yilning 29 may kuni mazkur holat yuzasidan Bosh konsulxonaga xabar kelib tushgan. Shundan so'ng Turkiyaning vakolatli tashkilotlari bilan hamkorlikda zarur ishlar boshlangan.
Hozirda marhumaning yaqinlariga jasadni O'zbekistonga qaytarish hamda boshqa konsullik-huquqiy masalalar bo'yicha amaliy ko'mak ko'rsatilmoqda.
Bosh konsulxona ma'lumotiga ko'ra, voqea yuzasidan tegishli tartibda surishtiruv ishlari davom etmoqda.
Eslatib o'tamiz, avvalroq Turkiyaning Sakarya viloyatidagi alyuminiy zavodida sodir bo'lgan baxtsiz hodisa oqibatida 54 yoshli O'zbekiston fuqarosi vafot etgani haqida xabar berilgan edi. Shuningdek, Turkiyada halok bo'lgan o'zbekistonlik Nodira Qodirova ishi qayta ko'rib chiqilayotgani ma'lum qilingan.
