Putin Zelenskiyning xatini o‘qiganini ma’lum qildi

Rossiya prezidenti Vladimir Putin Sankt-Peterburg xalqaro iqtisodiy forumi doirasida Ukraina prezidenti Vladimir Zelenskiy yo‘llagan ochiq xat bilan tanishib chiqqanini ma’lum qildi. Putinning aytishicha, mazkur xatni unga Rossiya prezidenti matbuot kotibi Dmitriy Peskov ko‘rsatgan. “Kecha yoq Peskov bu haqda aytgan edi. O‘sha paytda ko‘rishga ulgurmagan edim. Bugun ertalab u yana shu qog‘ozni olib keldi va men uni o‘qib chiqdim. Ravon yozilgan”, dedi Rossiya rahbari. Ma’lum bo‘lishicha, Zelenskiy 4 iyun kuni Putinga ochiq xat yo‘llab, Ukraina urushiga nuqta qo‘yish maqsadida to‘g‘ridan-to‘g‘ri muzokaralar o‘tkazishga tayyor ekanini bildirgan. Shuningdek, u ikki davlat rahbarlari o‘rtasida shaxsiy uchrashuv tashkil etish va aniq sanani belgilashni taklif qilgan. Putin esa Zelenskiy bilan uchrashuv o‘tkazish masalasiga munosabat bildirib, hozircha bundan ma’no ko‘rmayotganini aytdi. “Avvalo, yechim topish kerak”, dedi u. Rossiya prezidenti Zelenskiyning o‘z yoshi haqida aytgan fikrlariga ham javob qaytarib, asosiy masala insonning yoshida emas, balki uning ishlash salohiyati va samaradorligida ekanini ta’kidladi. Zelenskiy o‘z maktubida Rossiya rahbarini urushni to‘xtatishga chaqirib, agar Moskva bunga tayyor bo‘lmasa, Ukraina o‘z mustaqilligi va mavjudligi uchun kurashni davom ettirishini bildirgan. Urush boshlanganidan buyon Kiyev va Moskva o‘rtasida to‘g‘ridan-to‘g‘ri muloqot masalasi bir necha bor kun tartibiga chiqqan bo‘lsa-da, tomonlar hozirgacha mojaroni siyosiy yo‘l bilan hal etish bo‘yicha kelishuvga erisha olmagan.