Россия президенти Владимир Путин Санкт-Петербург халқаро иқтисодий форуми доирасида Украина президенти Владимир Зеленский йўллаган очиқ хат билан танишиб чиққанини маълум қилди.
Путиннинг айтишича, мазкур хатни унга Россия президенти матбуот котиби Дмитрий Песков кўрсатган.
“Кечаёқ Песков бу ҳақда айтган эди. Ўша пайтда кўришга улгурмагандим. Бугун эрталаб у яна шу қоғозни олиб келди ва мен уни ўқиб чиқдим. Равон ёзилган», деди Россия раҳбари.
Маълум бўлишича, Зеленский 4 июнь куни Путинга очиқ хат йўллаб, Украина урушига нуқта қўйиш мақсадида тўғридан-тўғри музокаралар ўтказишга тайёр эканини билдирган. Шунингдек, у икки давлат раҳбарлари ўртасида шахсий учрашув ташкил этиш ва аниқ санани белгилашни таклиф қилган.
Путин эса Зеленский билан учрашув ўтказиш масаласига муносабат билдириб, ҳозирча бундан маъно кўрмаётганини айтди.
“Аввало, ечим топиш керак”, деди у.
Россия президенти Зеленскийнинг ўз ёши ҳақида айтган фикрларига ҳам жавоб қайтариб, асосий масала инсоннинг ёшида эмас, балки унинг ишлаш салоҳияти ва самарадорлигида эканини таъкидлади.
Зеленский ўз мактубида Россия раҳбарини урушни тўхтатишга чақириб, агар Москва бунга тайёр бўлмаса, Украина ўз мустақиллиги ва мавжудлиги учун курашни давом эттиришини билдирган.
Уруш бошланганидан буён Киев ва Москва ўртасида тўғридан-тўғри мулоқот масаласи бир неча бор кун тартибига чиққан бўлса-да, томонлар ҳозиргача можарони сиёсий йўл билан ҳал этиш бўйича келишувга эриша олмаган.
