Samarqand viloyati Ishtixon tumanida tug'ruq uchun shifoxonaga olib kelingan ayol vafot etgani, homila esa nobud bo'lgani haqida tarqalgan xabarlar yuzasidan viloyat Sog'liqni saqlash boshqarmasi rasmiy munosabat bildirdi.
Ma'lum qilinishicha, fuqaro N.E. 10 aprel kuni Ishtixon tuman markaziy shifoxonasi tug'ruq bo'limiga qorin va bel sohasida og'riqlar bilan murojaat qilgan. Tibbiy tekshiruvlar davomida qog'anoq suvlarining xiralashgani hamda homila yurak urishida og'ir o'zgarishlar aniqlangan.
Shifokorlar tomonidan bemorga shoshilinch kesarcha kesish amaliyotini o'tkazish zarurligi haqida tushuntirilgan. Biroq yaqin qarindoshlar operatsiyaga rozi bo'lmagani sababli bemor boshqa shifoxonaga — Payariq tumani Chelak tug'ruq bo'limiga olib borilgan.
Keyingi tekshiruvlar natijasida homilaning antenatal o'limi holati qayd etilgan. Bemorga stasionar sharoitda tibbiy yordam ko'rsatilgan, biroq u 14 aprel kuni vafot etgan.
Sud-tibbiy ekspertiza xulosasiga ko'ra, ayolning o'limi o'tkir yurak-qon tomir va nafas yetishmovchiligi bilan kechgan o'pka arteriyasi tromboemboliyasi oqibatida yuz bergan.
Hozirda holat yuzasidan tergovga qadar tekshiruv harakatlari olib borilmoqda.
