2 mart kuni harbiy keskinlashuv boshlanganidan buyon Livanda Isroil tomonidan amalga oshirilayotgan havo zarbalari oqibatida halok bo‘lganlar soni 3593 kishiga yetdi, 10 990 kishi esa turli darajada jarohat olgan.
Bu haqda Livan Sog‘liqni saqlash vazirligi ijtimoiy tarmoqlarda ma’lum qildi.
Vazirlikning xabar berishicha, shanba kuni Isroil havo kuchlarining mamlakat janubidagi Nabatiya viloyati hamda G‘arbiy Bekaa mintaqasiga uyushtirgan hujumlari oqibatida so‘nggi 24 soat ichida 35 kishi halok bo‘lgan, 120 kishi jarohatlangan.
Ta’kidlanishicha, e’lon qilingan sulh mavjud bo‘lishiga qaramasdan, aholi yashash punktlariga havo zarbalari davom etmoqda. Shu bois, rasmiylar qurbonlar va jabrlanganlar soni kun yakunida yana ortishi mumkinligini istisno etmayapti.
Livan hukumati vaziyatni nazorat qilish qiyinlashib borayotganini ta’kidlab, tibbiy xizmatlar va qutqaruv guruhlari yuqori tayyorgarlik holatida ish olib borayotganini bildirgan. Hududlarda vayronagarchiliklar ortib borayotgani, ayrim aholi punktlarida infratuzilmaga jiddiy zarar yetgani ham qayd etilmoqda.
