Xitoy–Qirg'iziston–O'zbekiston xalqaro temiryo'li qurilishi doirasida yirik infratuzilma ishlari jadal sur'atlarda davom etmoqda. Bu haqda transport vaziri Ilhom Mahkamov ma'lum qildi.
Vazirning ta'kidlashicha, hozirgi kunda loyiha doirasida 25 ta tunnelda qazish ishlari olib borilib, umumiy hisobda 9 kilometrdan ortiq masofa qazib bo'lingan.
Loyiha doirasida jami 29 ta tunnel, 50 ta ko'prik hamda 19 ta stansiya, jumladan, ikki ta chegera stansiyasi va yuk ortish-tushirish bekati qurilishi rejalashtirilgan.
Qurilish ishlariga 5 800 dan ortiq maxsus texnika va 9 000 ga yaqin ishchi jalb etilgan. Hozirda bir qator ob'ektlarda, jumladan ramali ko'priklarda ham qurilish ishlari boshlangan bo'lib, poydevor va xandaq ishlari amalga oshirilmoqda.
Mutasadidlarning qayd etishicha, mazkur strategik loyiha 2030 yilga qadar yakuniga yetkazilishi ko'zda tutilgan. U ishga tushgach, temiryo'l orqali yiliga 15 million tonnagacha yuk tashish imkoniyati yaratilishi, shuningdek, tovarlarni yetkazib berish muddati o'rtacha 7 kungacha qisqarishi kutilmoqda.
Loyiha g'oyasi ilk bor 1996 yilda ilgari surilgan bo'lib, uni amalga oshirish bo'yicha o'tgan yillar davomida bir necha texnik-iqtisodiy hisob-kitoblar tayyorlangan. Tog'li hududlar, molyalashtirish va texnik murakkabliklar sabab loyiha uzoq yillar davomida kechiktirib kelingan.
2024 yil iyun oyida uch davlat o'rtasida temiryo'l qurilishi bo'yicha rasmiy bitim imzolangan. Shu yil 27 dekabrda esa qurilish ishlariga rasman start berilgan.
Rasmiylarga ko'ra, mazkur yirik infratuzilma loyihasi mintaqaviy transport aloqalarini yaxshilash, yuk oqimini oshirish hamda iqtisodiy hamkorlikni yanada kengaytirishga xizmat qiladi.
