Хитой–Қирғизистон–Ўзбекистон халқаро темирйўли қурилиши доирасида йирик инфратузилма ишлари жадал суръатларда давом этмоқда. Бу ҳақда транспорт вазири Илҳом Маҳкамов маълум қилди.
Вазирнинг таъкидлашича, ҳозирги кунда лойиҳа доирасида 25 та туннелда қазиш ишлари олиб борилиб, умумий ҳисобда 9 километрдан ортиқ масофа қазиб бўлинган.
Лойиҳа доирасида жами 29 та туннел, 50 та кўприк ҳамда 19 та станция, жумладан, икки та чегара станцияси ва юк ортиш-тушириш бекати қурилиши режалаштирилган.
Қурилиш ишларига 5 800 дан ортиқ махсус техника ва 9 000 га яқин ишчи жалб этилган. Ҳозирда бир қатор объектларда, жумладан рамали кўприкларда ҳам қурилиш ишлари бошланган бўлиб, пойдевор ва хандақ ишлари амалга оширилмоқда.
Мутасаддиларнинг қайд этишича, мазкур стратегик лойиҳа 2030 йилга қадар якунига етказилиши кўзда тутилган. У ишга тушгач, темирйўл орқали йилига 15 миллион тоннагача юк ташиш имконияти яратилиши, шунингдек, товарларни етказиб бериш муддати ўртача 7 кунгача қисқариши кутилмоқда.
Лойиҳа ғояси илк бор 1996 йилда илгари сурилган бўлиб, уни амалга ошириш бўйича ўтган йиллар давомида бир неча техник-иқтисодий ҳисоб-китоблар тайёрланган. Тогли ҳудудлар, молиялаштириш ва техник мураккабликлар сабаб лойиҳа узоқ йиллар давомида кечиктириб келинган.
2024 йил июнь ойида уч давлат ўртасида темирйўл қурилиши бўйича расмий битим имзоланган. Шу йил 27 декабрда эса қурилиш ишларига расман старт берилган.
Расмийларга кўра, мазкур йирик инфратузилма лойиҳаси минтақавий транспорт алоқаларини яхшилаш, юк оқимини ошириш ҳамда иқтисодий ҳамкорликни янада кенгайтиришга хизмат қилади.
