Toshkent shahrining Yunusobod tumani Soliq inspektsiyasida faoliyat yurituvchi ikki nafar inspektor pora olishda gumonlanib qo‘lga olindi. Bu haqda Davlat xavfsizlik xizmati xabar berdi.
Qayd etilishicha, DXH Call-markaziga kelib tushgan murojaat asosida Xizmatning Toshkent shahar bo‘yicha boshqarmasi hamda Iqtisodiy jinoyatlarga qarshi kurashish departamenti xodimlari hamkorligida tezkor tadbir o‘tkazilgan.
Aniqlanishicha, mazkur inspektorlar o‘zaro til biriktirgan holda xizmat mavqeidan foydalanib, tadbirkorga "Chilonzor buyum bozori kompleksi" aksiyadorlik jamiyatidan uchta savdo do‘konini ijaraga olishda yordam berishni va’da qilgan.
Ular o‘zlarining tanishlari orqali tadbirkorga tegishli mas’uliyati cheklangan jamiyatni ochiq savdo tenderida g‘olib deb toptirish va savdo do‘konlarini ijaraga berish bo‘yicha shartnomalarni rasmiylashtirib berish evaziga 5 ming AQSh dollari talab qilgan.
Tezkor tadbir davomida soliq inspektorlari so‘ralgan pul mablag‘ini olgan vaqtida ashyoviy dalillar bilan ushlangan.
Hozirda ularga nisbatan jinoyat ishi qo‘zg‘atilgan bo‘lib, tergov harakatlari olib borilmoqda.
Davlat xavfsizlik xizmati fuqarolarni korrupciya va boshqa qonunbuzilish holatlari haqida DXHning 1520 qisqa raqami orqali xabar berishga chaqirdi. Ma’lum qilinishicha, murojaat etuvchilarning shaxsi sir saqlanishi kafolatlanadi.
