Тошкент шаҳрининг Юнусобод тумани Солиқ инспекциясида фаолият юритувчи икки нафар инспектор пора олишда гумонланиб қўлга олинди. Бу ҳақда Давлат хавфсизлик хизмати хабар берди.
Қайд этилишича, ДХХ Call-марказига келиб тушган мурожаат асосида Хизматнинг Тошкент шаҳар бўйича бошқармаси ҳамда Иқтисодий жиноятларга қарши курашиш департаменти ходимлари ҳамкорлигида тезкор тадбир ўтказилган.
Аниқланишича, мазкур инспекторлар ўзаро тил бириктирган ҳолда хизмат мавқеидан фойдаланиб, тадбиркорга "Чилонзор буюм бозори комплекси" акциядорлик жамиятидан учта савдо дўконини ижарага олишда ёрдам беришни ваъда қилган.
Улар ўзларининг танишлари орқали тадбиркорга тегишли масъулияти чекланган жамиятни очиқ савдо тендерида ғолиб деб топтириш ва савдо дўконларини ижарага бериш бўйича шартномаларни расмийлаштириб бериш эвазига 5 минг АҚШ доллари талаб қилган.
Тезкор тадбир давомида солиқ инспекторлари сўралган пул маблағини олган вақтида ашёвий далиллар билан ушланган.
Ҳозирда уларга нисбатан жиноят иши қўзғатилган бўлиб, тергов ҳаракатлари олиб борилмоқда.
Давлат хавфсизлик хизмати фуқароларни коррупция ва бошқа қонунбузилиш ҳолатлари ҳақида ДХХнинг 1520 қисқа рақами орқали хабар беришга чақирди. Маълум қилинишича, мурожаат этувчиларнинг шахси сир сақланиши кафолатланади.
