Ma’lum qilinishicha, voqea bozor hududida xizmat olib borayotgan YPX inspektori tomonidan svetoforning taqiqlovchi qizil chirog‘ida harakatlangan Nexia-1 avtomobilini to‘xtatish bilan boshlandi. Inspektor haydovchiga qoidabuzarlikni tushuntirganda u buni inkor etib, mazkur joyda svetofor mavjud emasligini bildirgan.
Haydovchidan hujjatlar so‘ralganda u avtomashinaga o‘tirib, ichki ishlar xodimining qonuniy talabiga bo‘ysunmagan holda baqir-chagir qilgan va transport vositasini xodim tomonga haydab, voqea joyidan qochib ketgan. Ko‘rilgan choralar natijasida haydovchi Qoratepa qishlog‘ida to‘xtatilgan.
So‘roq jarayonida u agressiv holatda bo‘lganini, jarimadan qochish maqsadida voqea joyidan ketib qolganini bildirgan. Sud majlisida esa oz aybiga iqror bo‘lib, o‘sha kuni otasining avtomashinasida shifoxonaga borgani, qaytishda YPX xodimi tomonidan to‘xtatilgani va uning qonuniy talabiga bo‘ysunmay ketib qolganini ma’lum qilgan hamda suddan engillik so‘ragan.
Sud to‘plangan dalillar va tomonlarning fikrlarini inobatga olib, haydovchini Ma’muriy javobgarlik to‘g‘risidagi kodeksning 183-moddasi bilan aybli deb topdi va unga 7 sutka ma’muriy qamoq jazosi tayinlandi.
Shuningdek, 194-moddaning 1-qismiga asosan bazaviy hisoblash miqdorining besh baravari — 2 million 60 ming so‘m miqdorida jarima belgilandi. 34-modda tartibida yakuniy jazo sifatida 7 sutka ma’muriy qamoq qo‘llandi.
