Йиғилишда Булунғур, Нарпай, Оқдарё, Пахтачи, Қўшработ, Каттақўрғон туманлари ҳамда Каттақўрғон шаҳрининг иқтисодий салоҳияти муҳокама қилинди. Қайд этилишича, мазкур ҳудудларда аҳоли сони кўп бўлишига қарамай, юқори даромадли иш ўринлари етарли эмас. Шунингдек, айрим туманларда ишсизлик ва камбағаллик даражаси юқорилиги сақланиб қолмоқда.
Шу муносабат билан ҳудудларни аниқ ихтисослашув асосида ривожлантириш таклиф этилди. Хусусан, Булунғур, Қўшработ, Пахтачи ва Каттақўрғон туманлари қишлоқ хўжалиги, чорвачилик ва боғдорчилик марказларига айлантирилади. Бу ҳудудларда қатор йирик инвестиция лойиҳаларини амалга ошириш режалаштирилган.
Нарпай тумани ва Каттақўрғон шаҳри саноат ҳамда хизмат кўрсатиш соҳаларининг ўсиш нуқтаси сифатида белгиланди. Нарпайда 100 гектар майдонда саноат зонаси ташкил этилиб, умумий қиймати 500 миллион долларлик юқори қўшилган қийматга эга лойиҳалар жойлаштирилади. Лойиҳаларга Япониянинг йирик компанияларини жалб қилиш режалаштирилган.
Оқдарё тумани эса паррандачилик, тўқимачилик ва қайта ишлаш саноатига ихтисослаштирилади.
Йиғилишда Самарқанд вилоятининг туризм салоҳиятини кенгайтириш масалаларига ҳам алоҳида эътибор қаратилди. Шу мақсадда Самарқанд шаҳри тарихий марказидаги 13 та кўчани пиёдалар ҳудудига айлантириш ва янги туризм объектларини ташкил этиш ташаббуси қўллаб-қувватланди.
Шунингдек, “Оҳалик – Оқбўйро – Миронқул” туристик-рекреацион зонасини кенгайтириш, Имом Мотуридий ёдгорлик мажмуаси атрофини ободонлаштириш ва туризм инфратузилмасини ривожлантириш бўйича вазифалар белгиланди.
Йиғилиш якунида Президент ҳар бир туманда мавжуд имкониятлардан тўлиқ фойдаланиш, янги иш ўринлари яратиш, аҳоли даромадларини ошириш ва ҳудудлар ўртасидаги иқтисодий тафовутни қисқартириш бўйича мутасаддиларга топшириқлар берди.
