AQSh Prezidenti Donald Tramp Eron hududidagi nishonlarga qarshi yangi harbiy zarbalar berish bo'yicha ko'rsatma bergan. Bu haqda AQSh Mudofaa vaziri Pit Xegset ma'lum qildi.
Uning aytishicha, Amerika harbiylari tun davomida Eronga tegishli ob'ektlarga zarbalar berishni davom ettiradi. Xegset mazkur operatsiyalar Prezident Trampning topshirig'i asosida amalga oshirilayotganini bildirgan.
“AQSh Eronga qattiq zarba beradi”, degan Pentagon rahbari.
Uning ta'kidlashicha, harbiy amaliyotlarning asosiy maqsadlaridan biri Tehronni muzokaralar stoliga qaytarishdan iborat.
Xegset Vashington Eronga nisbatan bosimni kuchaytirish orqali mintaqadagi xavfsizlikka tahdid soluvchi harakatlarni cheklashni ko'zlayotganini ham qayd etgan.
Ayni paytda Eron tomoni rasmiylari mazkur bayonot yuzasidan hozircha munosabat bildirmagan.
So'nggi kunlarda Yaqin Sharqdagi vaziyat keskinlashib borayotgani kuzatilmoqda. AQSh va Eron o'rtasidagi qarama-qarshilik fonida xalqaro hamjamiyat tomonlarni vazminlikka chaqirmoqda.
