O‘zbekistonning qator tog‘oldi va tog‘li hududlarida 13–15 iyun kunlari sel-suv toshqinlari yuzaga kelishi mumkin. Bu haqda O‘zgidromet ogohlantirish bilan chiqdi.
Ma’lum qilinishicha, kutilayotgan yomg‘irlar sababli Qashqadaryo, Surxondaryo, Samarqand, Navoiy, Jizzax, Toshkent, Namangan, Farg‘ona va Andijon viloyatlarining ayrim tumanlarida sel kelishi xavfi saqlanib qolmoqda.
Xususan, sel-suv toshqinlari tog‘ soylari va kichik daryolarda suv sarfining keskin ortishi, shuningdek, tog‘ yonbag‘irlarida sel oqimlarining shakllanishiga sabab bo‘lishi mumkin.
Shu munosabat bilan tog‘oldi va tog‘li hududlarda yashovchi fuqarolar, dam oluvchilar hamda mazkur hududlar orqali harakatlanuvchi haydovchilardan ehtiyotkorlik choralarini ko‘rish so‘raldi.
Shuningdek, respublika bo‘yicha ayrim hududlarda kuchli yomg‘irlar natijasida yomg‘ir suvlari to‘planishi va past joylarni suv bosishi ehtimoli ham mavjud.
Mutasadidlar aholini havo ma’lumotlarini kuzatib borish va xavfsizlik qoidalariga qat’iy rioya qilishga chaqirmoqda.
