Toshkent shahrida o‘tkazilgan tezkor tadbir davomida 34 kilogrammdan ortiq giyohvandlik vositalari musodara qilindi. Bu haqda Davlat xavfsizlik xizmati ma’lum qildi.
Qayd etilishicha, giyohvandlik vositalarining noqonuniy aylanmasiga qarshi kurashish doirasida Davlat xavfsizlik xizmati va ichki ishlar organlari xodimlari hamkorligida maxsus operatsiya o‘tkazilgan.
Tezkor tadbir davomida poytaxtdagi “Qo‘yliq” bozori yaqinida shubhali tarzda to‘xtab turgan Lacetti rusumli avtomobil ko‘zdan kechirilgan.
Aniqlanishicha, transport vositasini Surxondaryo viloyati Sariosiyo tumanida yashovchi, muqaddam sudlangan 1968 yilda tug‘ilgan shaxs boshqarib kelgan. Avtomobilda, shuningdek, 1984 yilda Denov shahrida tug‘ilgan va hozirda Toshkent shahrida yashovchi fuqaro ham bo‘lgan.
Tekshiruv jarayonida avtomashina salonidagi plastik idish ichiga yashirilgan 30 ta o‘ramda jami 34 kilogramm 610 gramm og‘ir turdagi giyohvandlik vositalari borligi aniqlangan. Ulardan 12 kilogramm 960 grammi opiy, 21 kilogramm 650 grammi esa gashish ekani ma’lum bo‘lgan.
Mazkur moddalar ashyoviy dalil sifatida rasmiylashtirib olingan.
Dastlabki ma’lumotlarga ko‘ra, ushbu turdagi giyohvandlik vositalari mamlakat hududiga chet eldan kontrabanda yo‘li orqali olib kirilgan.
Hozirda ushbu shaxslarga nisbatan Jinoyat kodeksining tegishli moddalari bilan jinoyat ishi qo‘zg‘atilib, qamoq ehtiyot chorasi qo‘llangan.
Tergov harakatlari doirasida gumonlanuvchilarning ehtimoliy jinoiy sheriklarini aniqlash choralari ko‘rilmoqda.
