Turkiyaning Istanbul shahrida sodir bo'lgan yo'l-transport hodisasi oqibatida bir oila a'zolari halok bo'ldi. Bu haqda mahalliy Hürriyet nashri ma'lum qildi.
Ma'lum qilinishicha, fojia 11 iyun kuni ertalab Chekmekoy tumani hududidan o'tuvchi Shimoliy Marmara avtomagistralida yuz bergan. Sabiha Gökçen International Airportdan qaytayotgan 29 yoshli Sodiq Gyunden boshqaruvidagi yengil avtomobil yo'nalishda harakatlanayotgan yuk mashinasiga orqa tomondan urilib ketgan.
Zarbadan so'ng avtomobil yuk mashinasi tagiga kirib ketgan. Oqibatda avtomobil ichida qolib ketgan haydovchi Sodiq Gyunden, uning O'zbekiston fuqarosi bo'lgan 31 yoshli turmush o'rtog'i Aziza Hotamova Gyunden hamda 2 oylik o'g'li Timurxon Gyunden voqea joyida halok bo'lgan.
Qutqaruvchilar yetib kelgach, uchala jasad avtomobildan chiqarib olingan. Mahalliy ommaviy axborot vositalariga ko'ra, oila a'zolari to'rt yil avval turmush qurgan bo'lib, ularning yana 3 yoshli Said ismli farzandi ham bor. U hodisa vaqtida ota-onasi bilan birga bo'lmagan.
Xabarlarda qayd etilishicha, halok bo'lgan 2 oylik Timurxon yaqinda sunnat qilingan bo'lib, oila yaqin kunlarda sunnat to'yini o'tkazishni rejalashtirgan edi.
Shuningdek, Istanbulda 8 iyun kuni sodir bo'lgan yana bir yo'l-transport hodisasida 6 yoshli O'zbekiston fuqarosi ham halok bo'lgani ma'lum qilingandi.
