Туркиянинг Истанбул шаҳрида содир бўлган йўл-транспорт ҳодисаси оқибатида бир оила аъзолари ҳалок бўлди. Бу ҳақда маҳаллий Hürriyet нашри маълум қилди.
Маълум қилинишича, фожиа 11 июнь куни эрталаб Чекмекөй тумани ҳудудидан ўтувчи Шимолий Мармара автомагистралида юз берган. Sabiha Gökçen International Airportдан қайтаётган 29 ёшли Содиқ Гюнден бошқарувидаги енгил автомобиль йўналишда ҳаракатланаётган юк машинасига орқа томондан урилиб кетган.
Зарбадан сўнг автомобиль юк машинаси тагига кириб кетган. Оқибатда автомобиль ичида қолиб кетган ҳайдовчи Содиқ Гюнден, унинг Ўзбекистон фуқароси бўлган 31 ёшли турмуш ўртоғи Азиза Ҳотамова Гюнден ҳамда 2 ойлик ўғли Тимурхон Гюнден воқеа жойида ҳалок бўлган.
Қутқарувчилар етиб келгач, учала жасад автомобилдан чиқариб олинган. Маҳаллий оммавий ахборот воситаларига кўра, оила аъзолари тўрт йил аввал турмуш қурган бўлиб, уларнинг яна 3 ёшли Саид исмли фарзанди ҳам бор. У ҳодиса вақтида ота-онаси билан бирга бўлмаган.
Хабарларда қайд этилишича, ҳалок бўлган 2 ойлик Тимурхон яқинда суннат қилинган бўлиб, оила яқин кунларда суннат тўйини ўтказишни режалаштирган эди.
Шунингдек, Истанбулда 8 июнь куни содир бўлган яна бир йўл-транспорт ҳодисасида 6 ёшли Ўзбекистон фуқароси ҳам ҳалок бўлгани маълум қилинганди.
