AQSh va Eron o‘rtasida tinchlik kelishuviga erishildi. Bu haqda Pokiston Bosh vaziri Shahboz Sharif ma’lum qildi.
Uning so‘zlariga ko‘ra, tomonlar barcha yo‘nalishlarda, jumladan Livanda ham harbiy harakatlarni zudlik bilan va uzil-kesil to‘xtatishga kelishib olgan. Kelishuvni rasmiy imzolash marosimi 19 iyun kuni Shveytsariyaning Jeneva shahrida bo‘lib o‘tadi.
Shahboz Sharifning ta’kidlashicha, muzokaralarda vositachilik qilgan Pokiston AQSh va Eron, shuningdek, jarayonda ishtirok etgan Qatar, Saudiya Arabistoni va Turkiyaga minnatdorlik bildirgan.
AQSh Prezidenti Donald Trump ham Truth Social ijtimoiy tarmog‘ida Eron bilan kelishuv yakunlanganini e’lon qildi.
“Barchani tabriklayman! Men Hormuz bo‘g‘ozini boj va cheklovlarsiz ochishga hamda AQSh harbiy-dengiz kuchlari tomonidan o‘rnatilgan dengiz blokadasini darhol bekor qilishga ruxsat berdim. Dunyo kemalari, dvigatellaringizni ishga tushiring. Neft oqimi davom etsin”, deb yozdi Tramp.
Keyinchalik u jurnalistlarga Hormuz bo‘g‘azi Eron bilan kelishuv rasman imzolanganidan keyin ochilishini ma’lum qildi.
Eron Tashqi ishlar vaziri o‘rinbosari Kozim G‘aribobodiy davlat televideniyesiga bergan intervyusida AQSh bilan kelishuv matni yakunlanganini va u 19 iyun kuni Jeneva shahrida imzolanishini tasdiqladi.
Uning aytishicha, kelishuvdan so‘ng 60 kun davomida yakuniy tinchlik shartnomasini ishlab chiqish bo‘yicha muzokaralar olib boriladi. Shu davrda Eron memorandum shartlari bajarilishini qat’iy nazorat qilib boradi.
Shuningdek, AQSh vitse-prezidenti Jey Di Vens Jenevadagi imzolash marosimida qatnashishni rejalashtirayotganini, biroq u yerga Prezident Donald Trumpning o‘zi ham borishi mumkinligini aytgan.
Hozircha kelishuvning to‘liq matni jamoatchilikka e’lon qilinmagan.
