АҚШ ва Эрон ўртасида тинчлик келишувига эришилди. Бу ҳақда Покистон Бош вазири Шаҳбоз Шариф маълум қилди.
Унинг сўзларига кўра, томонлар барча йўналишларда, жумладан Ливанда ҳам ҳарбий ҳаракатларни зудлик билан ва узил-кесил тўхтатишга келишиб олган. Келишувни расмий имзолаш маросими 19 июнь куни Швейцариянинг Женева шаҳрида бўлиб ўтади.
Шаҳбоз Шарифнинг таъкидлашича, музокараларда воситачилик қилган Покистон АҚШ ва Эронга, шунингдек, жараёнда иштирок этган Қатар, Саудия Арабистони ва Туркияга миннатдорлик билдирган.
АҚШ Президенти Дональд Трамп ҳам Truth Social ижтимоий тармоғида Эрон билан келишув якунланганини эълон қилди.
“Барчани табриклайман! Мен Ҳурмуз бўғозини бож ва чекловларсиз очишга ҳамда АҚШ ҳарбий-денгиз кучлари томонидан ўрнатилган денгиз блокадасини дарҳол бекор қилишга рухсат бердим. Дунё кемалари, двигателларингизни ишга туширинг. Нефт оқими давом этсин”, деб ёзди Трамп.
Кейинчалик у журналистларга Ҳормуз бўғози Эрон билан келишув расман имзоланганидан кейин очилишини маълум қилди.
Эрон Ташқи ишлар вазири ўринбосари Козим Ғарибободий давлат телевидениесига берган интервьюсида АҚШ билан келишув матни якунланганини ва у 19 июнь куни Женева шаҳрида имзоланишини тасдиқлади.
Унинг айтишича, келишувдан сўнг 60 кун давомида якуний тинчлик шартномасини ишлаб чиқиш бўйича музокаралар олиб борилади. Шу даврда Эрон меморандум шартлари бажарилишини қатъий назорат қилиб боради.
Шунингдек, АҚШ вице-президенти Жей Ди Вэнс Женевадаги имзолаш маросимида қатнашишни режалаштираётганини, бироқ у ерга Президент Дональд Трампнинг ўзи ҳам бориши мумкинлигини айтган.
Ҳозирча келишувнинг тўлиқ матни жамоатчиликка эълон қилинмаган.
