Tabrik maktubida Si Szinpin Xitoy Xalq Respublikasi va Xitoy Kommunistik partiyasining yirik siyosiy arbobi sifatida Vatan va xalqqa bo‘lgan cheksiz mehr-muhabbat, yuksak mas’uliyat hissi hamda uzoqni ko‘ra bilishga asoslangan strategik tafakkur bilan mamlakatni yangi marralar sari boshlab borayotgani ta’kidlangan.
“Sizning oqilona rahbarligingiz ostida Xitoy modernizatsiyasi izchil davom etmoqda, millatning buyuk tiklanishi va yuksalishiga qaratilgan siyosatingiz mamlakatingiz tarixiga yorqin sahifa sifatida yozilmoqda”, deyiladi tabrikda.
Shuningdek, maktubda O‘zbekiston va Xitoy o‘rtasidagi munosabatlar so‘nggi yillarda yangi bosqichga ko‘tarilgani qayd etilgan. Davlatlar o‘rtasidagi do‘stlik, o‘zaro ishonch va har qanday sharoitdagi har tomonlama strategik sheriklik munosabatlari yil sayin mustahkamlanib borayotgani alohida ta’kidlangan.
“Biz Yangi O‘zbekistonda amalga oshirayotgan keng ko‘lamli islohotlarda Xitoy Xalq Respublikasi va shaxsan Sizning doimiy ko‘magingiz hamda qo‘llab-quvvatlovingizni yaqqol his qilib kelmoqdamiz”, deyiladi maktubda.
Qayd etilishicha, o‘tgan yillar davomida barcha asosiy sohalarda o‘zaro manfaatli va ko‘p pog‘onali hamkorlik mexanizmlari shakllangan. Shuningdek, “Bir makon — bir yo‘l” tashabbusi doirasida salmoqli amaliy natijalarga erishilgan.
Prezident Shavkat Mirziyoyev oliy darajadagi uchrashuvlar davomida erishilgan kelishuvlarni to‘liq amalga oshirish orqali O‘zbekiston va Xitoy o‘rtasidagi hamkorlikni sifat jihatidan yangi bosqichga olib chiqish mumkinligiga ishonch bildirgan.
Maktub so‘ngida davlat rahbari Si Szinpinga mustahkam sog‘liq, oilaviy baxt-saodat va mas’uliyatli davlatchilik faoliyatida ulkan muvaffaqiyatlar, Xitoy xalqiga esa tinchlik-osoyishtalik va bardavom taraqqiyot tilagan.
