Табрик мактубида Си Цзиньпин Хитой Халқ Республикаси ва Хитой Коммунистик партиясининг йирик сиёсий арбоби сифатида Ватан ва халққа бўлган чексиз меҳр-муҳаббат, юксак масъулият ҳисси ҳамда узоқни кўра билишга асосланган стратегик тафаккур билан мамлакатни янги марралар сари бошлаб бораётгани таъкидланган.
“Сизнинг оқилона раҳбарлигингиз остида Хитой модернизацияси изчил давом этмоқда, миллатнинг буюк тикланиши ва юксалишига қаратилган сиёсатингиз мамлакатингиз тарихига ёрқин саҳифа сифатида ёзилмоқда”, дейилади табрикда.
Шунингдек, мактубда Ўзбекистон ва Хитой ўртасидаги муносабатлар сўнгги йилларда янги босқичга кўтарилгани қайд этилган. Давлатлар ўртасидаги дўстлик, ўзаро ишонч ва ҳар қандай шароитдаги ҳар томонлама стратегик шериклик муносабатлари йил сайин мустаҳкамланиб бораётгани алоҳида таъкидланган.
“Биз Янги Ўзбекистонда амалга ошираётган кенг кўламли ислоҳотларда Хитой Халқ Республикаси ва шахсан Сизнинг доимий кўмагингиз ҳамда қўллаб-қувватловингизни яққол ҳис қилиб келмоқдамиз”, дейилади мактубда.
Қайд этилишича, ўтган йиллар давомида барча асосий соҳаларда ўзаро манфаатли ва кўп поғонали ҳамкорлик механизмлари шаклланган. Шунингдек, “Бир макон — бир йўл” ташаббуси доирасида салмоқли амалий натижаларга эришилган.
Президент Шавкат Мирзиёев олий даражадаги учрашувлар давомида эришилган келишувларни тўлиқ амалга ошириш орқали Ўзбекистон ва Хитой ўртасидаги ҳамкорликни сифат жиҳатидан янги босқичга олиб чиқиш мумкинлигига ишонч билдирган.
Мактуб сўнгида давлат раҳбари Си Сзинпинга мустаҳкам соғлиқ, оилавий бахт-саодат ва масъулиятли давлатчилик фаолиятида улкан муваффақиятлар, Хитой халқига эса тинчлик-осойишталик ва бардавом тараққиёт тилаган.
