Braziliyaning Rio-de-Janeyro shahrida ikki vertolyotning havoda to‘qnashib ketishi oqibatida olti kishi halok bo‘ldi. Mahalliy va xalqaro ommaviy axborot vositalari qurbonlar orasida amerikalik xonanda Oliver Tri ham bo‘lishi mumkinligini xabar qilmoqda.
Ma’lum qilinishicha, fojea 14 iyun kuni Rio-de-Janeyro shahrining Rekreyu-dus-Bandeyrantis tumani osmonida sodir bo‘lgan. Dastlabki ma’lumotlarga ko‘ra, havoda to‘qnashgan ikki vertolyot yerga qulab tushgan.
Vertolyotlardan birida besh nafar yo‘lovchi, ikkinchisida esa uchuvchi bo‘lgan. Hodisa oqibatida ularning barchasi halok bo‘lgan.
Ommaviy axborot vositalari politsiya manbalariga tayanib, qurbonlar orasida 32 yoshli amerikalik xonanda va qo‘shiq muallifi Oliver Tri ham bo‘lganini yozmoqda. U Braziliyaga jahon gastrol safari doirasida kelgani aytilmoqda.
Shuningdek, halok bo‘lganlar orasida braziliyalik musiqa produseri, argentinalik videorejissyor va YouTube blogeri Gaspar Prim ham borligi xabar qilingan.
To‘qnashuvdan keyin har ikki vertolyot elektromobillar avtosaloni hududiga qulab tushgan. Hodisa oqibatida yong‘in kelib chiqqan va bir necha o‘nta avtomobil shikastlangan.
Ayni paytda huquq-tartibot idoralari va qutqaruv xizmatlari tomonidan fojea sabablari o‘rganilmoqda. Tergov doirasida texnik nosozlik, inson omili hamda parvozlarni muvofiqlashtirishdagi ehtimoliy xatolar ko‘rib chiqilmoqda.
Rasmiylar ma’lum qilishicha, qurbonlarning shaxsini aniqlash jarayoni davom etmoqda. Jasadlar qattiq kuygani sababli qo‘shimcha ekspertizalar tayinlangan
