Farg'ona viloyatining Yozyovon tumanida yuz bergan yong'in oqibatida ikki nafar fuqaro halok bo'ldi. Bu haqda viloyat Favqulodda vaziyatlar boshqarmasi xabar berdi.
Ma'lum qilinishicha, 16 iyun kuni soat 22:16 da “112” tizimi orqali Yozyovon tumanidagi “Soy bo'yi” mahallasi hududida avtomobil yonayotgani haqida xabar kelib tushgan.
Xabar asosida hodisa joyiga yetib borgan qutqaruvchilar yong'inni qisqa vaqt ichida o'chirishga muvaffaq bo'lgan.
Dastlabki ma'lumotlarga ko'ra, yong'in natijasida qarovsiz noturar binoning 60 kvadrat metr qismi hamda Labo, Hyundai va Mercedes-Benz rusumli uchta transport vositasi yonib zararlangan.
Bildirilishicha, hodisa oqibatida ikki nafar fuqaro halok bo'lgan. Yana uch nafar fuqaro turli darajadagi tan jarohatlari bilan shifoxonaga yotqizilgan.
Ayni paytda yong'inning kelib chiqish sabablari hamda yetkazilgan moddiy zarar miqdori aniqlanmoqda. Voqea joyida viloyat Favqulodda vaziyatlar boshqarmasi rahbariyati, tuman bo'limi mas'ullari va tegishli xizmatlar vakillari tomonidan o'rganish ishlari olib borilmoqda.
