Фарғона вилоятининг Ёзёвон туманида юз берган ёнғин оқибатида икки нафар фуқаро ҳалок бўлди. Бу ҳақда вилоят Фавқулодда вазиятлар бошқармаси хабар берди.
Маълум қилинишича, 16 июнь куни соат 22:16 да “112” тизими орқали Ёзёвон туманидаги “Сой бўйи” маҳалласи ҳудудида автомобиль ёнаётгани ҳақида хабар келиб тушган.
Хабар асосида ҳодиса жойига етиб борган қутқарувчилар ёнғинни қисқа вақт ичида ўчиришга муваффақ бўлган.
Дастлабки маълумотларга кўра, ёнғин натижасида қаровсиз нотурар бинонинг 60 квадрат метр қисми ҳамда Labo, Hyundai ва Mercedes-Benz русумли учта транспорт воситаси ёниб зарарланган.
Билдирилишича, ҳодиса оқибатида икки нафар фуқаро ҳалок бўлган. Яна уч нафар фуқаро турли даражадаги тан жароҳатлари билан шифохонага ётқизилган.
Айни пайтда ёнғиннинг келиб чиқиш сабаблари ҳамда етказилган моддий зарар миқдори аниқланмоқда. Воқеа жойида вилоят Фавқулодда вазиятлар бошқармаси раҳбарияти, туман бўлими масъуллари ва тегишли хизматлар вакиллари томонидан ўрганиш ишлари олиб борилмоқда.
