Prezident Shavkat Mirziyoyev Toshkent xalqaro investitsiya forumida investorlar huquqlarini ishonchli himoya qilish va mamlakatning sarmoyaviy jozibadorligini oshirish maqsadida Toshkent xalqaro moliya markazi tashkil etilishini ma'lum qildi.
Davlat rahbarining ta'kidlashicha, investorlar huquqlarini kuchli institutlar va xalqaro mexanizmlar orqali ta'minlash bugungi kunda ustuvor vazifalardan biri hisoblanadi. Shu maqsadda joriy yilning mart oyidan mazkur markazni tashkil etish bo'yicha amaliy ishlar boshlangan.
Qayd etilishicha, markazning huquqiy maqomi Konstitutsiyaviy qonun bilan mustahkamlanadi. Uning ishtirokchilari uchun alohida soliq rejimi joriy qilinib, foyda solig'i, qo'shilgan qiymat solig'i, mol-mulk solig'i hamda bojxona bojlari nol foiz etib belgilanadi.
Shuningdek, kapitalning erkin harakati va istalgan valyutada hisob-kitob qilish imkoniyati kafolatlanadi. Markaz hududida moliyaviy texnologiyalar, raqamli aktivlar hamda "yashil" moliya yo'nalishlarini rivojlantirish uchun zamonaviy infratuzilma yaratiladi.
Prezidentning ma'lum qilishicha, markaz hududida normativ-huquqiy hujjatlarni qabul qilish vakolatiga ega mustaqil moliyaviy regulyator ham faoliyat yuritadi.
Bundan tashqari, Toshkent xalqaro moliya markazida Angliya huquqi tamoyillariga asoslangan maxsus huquqiy rejim joriy etiladi. Shuningdek, nufuzli xorijiy sudyalar va xalqaro ekspertlar ishtirokida mustaqil Toshkent xalqaro tijorat sudi tashkil qilinadi.
Ayni paytda investitsiyaviy mediatsiya institutini rivojlantirish choralari ham ko'rilmoqda. Shu munosabat bilan O'zbekiston BMTning Meditatsiya to'g'risidagi Singapur konvensiyasiga qo'shilish niyatida.
Davlat rahbarining ta'kidlashicha, mazkur choralar natijasida investorlar O'zbekiston hududining o'zida xalqaro standartlarga mos huquqiy himoya mexanizmlaridan foydalanish imkoniyatiga ega bo'ladi.
Dastlabki bosqichda markaz ishtirokchilari uchun joriy etilayotgan soliq va bojxona imtiyozlari hamda maxsus huquqiy rejimning amal qilish muddati 50 yil etib belgilanadi.
Prezident mahalliy va xorijiy investorlarni mamlakatda yaratilayotgan yangi imkoniyatlar va shakllanayotgan moliyaviy ekotizimdan samarali foydalanishga chaqirdi.
