Тошкент шаҳрида гуманоид роботлар ва уларнинг бутловчи қисмларини ишлаб чиқаришга ихтисослашган йирик завод қурилиши бошланди. Лойиҳа Жанубий Кореянинг Robotis компанияси ҳамкорлигида амалга оширилмоқда. Бу ҳақда Инвестициялар, саноат ва савдо вазирлиги хабар берди.
Корхонага тамал тоши қўйиш маросими Тошкент халқаро инвестиция форуми доирасида “Янги Авлод” саноат зонасида бўлиб ўтди. Унда расмийлар ва Robotis компанияси раҳбарияти иштирок этди.
Маълум қилинишича, лойиҳанинг умумий қиймати 70 миллион долларни ташкил этади. Завод 10 гектар майдонда барпо этилади ва 2 мингдан ортиқ янги иш ўрни яратилиши кутилмоқда.
Таъкидланишича, янги корхона юқори технологияли ишлаб чиқаришни йўлга қўйиш, халқаро тажрибани жалб этиш ҳамда малакали мутахассислар тайёрлашга хизмат қилади.
Расмийлар мазкур лойиҳани Ўзбекистонда робототехника соҳасини ривожлантириш ва мамлакатни Марказий Осиёдаги етакчи технологик марказлардан бирига айлантириш йўлидаги муҳим қадам сифатида баҳоламоқда.
