Qayd etilishicha, hodisa kecha, 21 iyun kuni soat taxminan 21:00 da Yakkasaroy tumanida sodir bo‘lgan. 38-sonli yo‘nalishda harakatlangan "King Long" rusumli avtobus haydovchisi Shota Rustaveli ko‘chasi bo‘ylab Janubiy vokzal tomon harakatlanayotgan vaqtda tartibga solingan piyodalar o‘tish joyidan svetoforning taqiqlovchi signalida yugurib o‘tgan 26 yoshli fuqaro A.A.ni urib yuborgan.
Ma’lum qilinishicha, haydovchi zudlik bilan transport vositasini to‘xtatib, jabrlanuvchini tez tibbiy yordam avtomobili orqali 16-sonli shahar shifoxonasiga yuborgan. Hozircha uning ahvoli haqida ma’lumot berilmagan.
Mazkur yo‘l-transport hodisasi Toshkent shahar Ichki ishlar bosh boshqarmasi mas’ul xodimlari tomonidan belgilangan tartibda rasmiylashtirilgan.
Eslatib o‘tamiz, joriy yilning 2 aprel kuni Yakkasaroy tumanida avtobus svetoforning qizil chirog‘ida harakatlanib, yo‘lni kesib o‘tayotgan 13 yoshli qizchani urib yuborgan edi. Shuningdek, 6 iyun kuni Bektemir tumanida "Yutong" rusumli elektrobus orqaga harakatlanayotgan vaqtda 1991 yilda tug‘ilgan piyodani bosib ketgan, oqibatda u voqea joyida halok bo‘lgan.
