Қайд этилишича, ҳодиса кеча, 21 июнь куни соат тахминан 21:00 да Яккасарой туманида содир бўлган. 38-сонли йўналишда ҳаракатланган “King Long” русумли автобус ҳайдовчиси Шота Руставели кўчаси бўйлаб Жанубий вокзал томон ҳаракатланаётган вақтда тартибга солинган пиёдалар ўтиш жойидан светофорнинг тақиқловчи сигналида югуриб ўтган 26 ёшли фуқаро А.А.ни уриб юборган.
Маълум қилинишича, ҳайдовчи зудлик билан транспорт воситасини тўхтатиб, жабрланувчини тез тиббий ёрдам автомобили орқали 16-сонли шаҳар шифохонасига юборган. Ҳозирча унинг аҳволи ҳақида маълумот берилмаган.
Мазкур йўл-транспорт ҳодисаси Тошкент шаҳар Ички ишлар бош бошқармаси масъул ходимлари томонидан белгиланган тартибда расмийлаштирилган.
Эслатиб ўтамиз, жорий йилнинг 2 апрель куни Яккасарой туманида автобус светофорнинг қизил чироғида ҳаракатланиб, йўлни кесиб ўтаётган 13 ёшли қизчани уриб юборган эди. Шунингдек, 6 июнь куни Бектемир туманида “Yutong” русумли электробус орқага ҳаракатланаётган вақтда 1991 йилда туғилган пиёдани босиб кетган, оқибатда у воқеа жойида ҳалок бўлган.
