Farg'ona viloyatida 18 yoshli qizni aldash yo'li bilan Turkiyaga olib chiqib ketishga uringan shaxslar qo'lga olindi. Bu haqda Ichki ishlar vazirligi xabar berdi.
Ma'lum qilinishicha, viloyat Ichki ishlar boshqarmasining Uyushgan jinoyatchilikka qarshi kurashish boshqarmasi hamda Odam savdosiga qarshi kurashish bo'limi xodimlari tomonidan o'tkazilgan tezkor tadbir davomida jinoiy guruh faoliyatiga chek qo'yilgan.
Dastlabki ma'lumotlarga ko'ra, muqaddam Quva tumanida yashagan, hozirda Turkiyaning Denizli shahrida istiqomat qilayotgan ayol va uning Farg'ona shahrida yashovchi sherigi oldindan til biriktirgan holda qizlarni xorijga jo'natish bilan shug'ullanib kelgan.
Aniqlanishicha, ular Farg'ona shahrida yashovchi 2008 yilda tug'ilgan qizni Turkiyada yuqori maoshli ish taklif qilish bahonasida xorijga olib chiqib ketishga uringan. Qiz taklifga rozilik bildirgan, biroq huquqni muhofaza qiluvchi organlar tomonidan o'tkazilgan tezkor tadbir natijasida mazkur harakatning oldi olingan.
Mazkur holat yuzasidan Jinoyat kodeksining 135-moddasi bilan jinoyat ishi qo'zg'atilgan. Ayni paytda tergov harakatlari davom etmoqda.
