U o‘z murojaatini “xalq nomidan” qilayotganini aytib, oddiy fuqarolar va davlat rahbari o‘rtasida “qalin devor” borligini ta’kidladi. 18 daqiqalik video uning Instagram sahifasida e’lon qilingan.
Murojaatda blogger Dog‘istondagi suv toshqinlari, Anapa hududidagi ekologik muammolar, jumladan mazut dog‘lari, shuningdek “Qizil kitob”ga kiritilgan hayvonlarni ovlashga oid qaror loyihasi haqida tanqidiy fikrlar bildirdi. Uning so‘zlariga ko‘ra, ayrim hududlarda fuqarolar muammolar bilan yolg‘iz qolmoqda.
Shuningdek, u Novosibirsk viloyatida chorva mollarini musodara qilish holatlarini ham tilga olib, ayrim harakatlar keskin tanqidga loiq ekanini aytdi.
Bonya ijtimoiy tarmoqlar cheklanishi masalasiga ham to‘xtalib, bu holat odamlarni bir-biri bilan aloqada bo‘lish imkoniyatidan mahrum qilayotganini qayd etdi. U prezidentga fuqarolar to‘g‘ridan-to‘g‘ri murojaat qila oladigan ochiq platforma yaratishni taklif qildi.
Mazkur murojaatni blogger Ayza-Liluna Ay ham qo‘llab-quvvatlab, mamlakatdagi ijtimoiy muammolar va axborot olish imkoniyatlari cheklanayotganini tanqid qildi.
