Toshkent shahrida yerosti yo‘lagida ayolga nisbatan shahvoniy shilqimlik qilib, uni ishtonsiz holda quvlagan erkakka nisbatan sud hukmi chiqarildi. Darakchi.uz sud hujjatlari bilan tanishdi.
Sud hujjatlariga ko‘ra, joriy yilning 1 iyul kuni soat 11:00 atrofida 31 yoshli erkak Toshkent shahri, Yakkasaroy tumani, Shota Rustaveli ko‘chasidagi 53-uy oldida joylashgan yerosti yo‘lagida ayolning yo‘lini to‘sgan. Shundan so‘ng u jabrlanuvchiga nisbatan shahvoniy shilqimlik qilgan, ishtonini yechgan holda uni quvlagan.
Sud majlisida huquqbuzar o‘z aybiga to‘liq iqror bo‘lgan. U sodir etgan qilmishidan pushaymon ekanini, kelgusida bunday harakatlarni takrorlamasligini bildirib, suddan yengillik berishni so‘ragan.
Sud qaroriga muvofiq, u Ma'muriy javobgarlik to‘g‘risidagi kodeksning 41¹-moddasi birinchi qismida nazarda tutilgan huquqbuzarlik — shahvoniy shilqimlik qilishda aybdor deb topilgan.
Unga nisbatan mazkur modda asosida 5 sutka muddatga ma'muriy qamoq jazosi tayinlangan.
