Тошкент шаҳрида ерости йўлагида аёлга нисбатан шаҳвоний шилқимлик қилиб, уни иштонсиз ҳолда қувлаган эркакка нисбатан суд ҳукми чиқарилди. Darakchi.uz суд ҳужжатлари билан танишди.
Суд ҳужжатларига кўра, жорий йилнинг 1 июль куни соат 11:00 атрофида 31 ёшли эркак Тошкент шаҳри, Яккасарой тумани, Шота Руставели кўчасидаги 53-уй олдида жойлашган ерости йўлагида аёлнинг йўлини тўсган. Шундан сўнг у жабрланувчига нисбатан шаҳвоний шилқимлик қилган, иштонини ечган ҳолда уни қувлаган.
Суд мажлисида ҳуқуқбузар ўз айбига тўлиқ иқрор бўлган. У содир этган қилмишидан пушаймон эканини, келгусида бундай ҳаракатларни такрорламаслигини билдириб, суддан енгиллик беришни сўраган.
Суд қарорига мувофиқ, у Маъмурий жавобгарлик тўғрисидаги кодекснинг 41¹-моддаси биринчи қисмида назарда тутилган ҳуқуқбузарлик — шаҳвоний шилқимлик қилишда айбдор деб топилган.
Унга нисбатан мазкур модда асосида 5 сутка муддатга маъмурий қамоқ жазоси тайинланган.
