O‘zbekiston Respublikasi Bosh vazirining o‘rinbosari — Oila va xotin-qizlar qo‘mitasi raisi Zulayho Bahriddinovna Mahkamova egallab turgan lavozimidan ozod etildi. Bu haqda Darakchi.uz'ning Hukumatdagi manbasi xabar berdi.
Zulayho Mahkamova 1968 yil 29 avgust kuni Namangan viloyati Yangiqo‘rg‘on tumanida tug‘ilgan.
U mehnat faoliyati davomida turli rahbarlik lavozimlarida ishlagan. Xususan, 2011–2017 yillarda Namangan viloyati kasaba uyushmalari tashkilotlari birlashmasi raisi, 2017–2018 yillarda Namangan viloyati hokimining o‘rinbosari hamda viloyat xotin-qizlar qo‘mitasi raisi sifatida faoliyat yuritgan.
2018 yil 24 apreldan O‘zbekiston Xotin-qizlar qo‘mitasi raisi birinchi o‘rinbosari lavozimida ishlagan Mahkamova 2020 yil 4 mart kuni To‘raqo‘rg‘on tumani hokimi etib tayinlangan. Shu tariqa u O‘zbekiston tarixidagi beshinchi ayol hokimga aylangan.
2022 yil 1 martdan buyon esa qayta tashkil etilgan O‘zbekiston Respublikasi Oila va xotin-qizlar qo‘mitasi raisi, shuningdek, Bosh vazir o‘rinbosari sifatida faoliyat olib borayotgan edi.
Uning o‘rniga Dilnoza Sobirjonovna Kattaxonova O‘zbekiston Respublikasi Bosh vazirining o‘rinbosari — Oila va xotin-qizlar qo‘mitasi raisi etib tayinlandi.
