Ўзбекистон Республикаси Бош вазирининг ўринбосари — Оила ва хотин-қизлар қўмитаси раиси Зулайҳо Баҳриддиновна Маҳкамова эгаллаб турган лавозимидан озод этилди. Бу ҳақда Darakchi.uz'нинг Ҳукуматдаги манбаси хабар берди.
Зулайҳо Маҳкамова 1968 йил 29 август куни Наманган вилояти Янгиқўрғон туманида туғилган.
У меҳнат фаолияти давомида турли раҳбарлик лавозимларида ишлаган. Хусусан, 2011–2017 йилларда Наманган вилояти касаба уюшмалари ташкилотлари бирлашмаси раиси, 2017–2018 йилларда Наманган вилояти ҳокимининг ўринбосари ҳамда вилоят хотин-қизлар қўмитаси раиси сифатида фаолият юритган.
2018 йил 24 апрелдан Ўзбекистон Хотин-қизлар қўмитаси раиси биринчи ўринбосари лавозимида ишлаган Маҳкамова 2020 йил 4 март куни Тўрақўрғон тумани ҳокими этиб тайинланган. Шу тариқа у Ўзбекистон тарихидаги бешинчи аёл ҳокимга айланган.
2022 йил 1 мартдан буён эса қайта ташкил этилган Ўзбекистон Республикаси Оила ва хотин-қизлар қўмитаси раиси, шунингдек, Бош вазир ўринбосари сифатида фаолият олиб бораётган эди.
Унинг ўрнига Дилноза Собиржоновна Каттахонова Ўзбекистон Республикаси Бош вазирининг ўринбосари — Оила ва хотин-қизлар қўмитаси раиси этиб тайинланди.
