AQSh Markaziy qo‘mondonligi (CENTCOM) prezident Donald Tramp vaqtinchalik o‘t ochishni to‘xtatish to‘g‘risidagi kelishuv amal qilishdan to‘xtaganini ma’lum qilganidan so‘ng Eron hududiga yettinchi tun ketma-ket havo zarbalari berganini bildirdi.
CENTCOM ma’lumotiga ko‘ra, zarbalar kuzatuv nuqtalari, harbiy logistika infratuzilmasi, er osti qurol-yarog‘ omborlari hamda dengiz harbiy imkoniyatlariga qarshi qaratilgan. Amaliyotda qiruvchi samolyotlar, uchuvchisiz apparatlar, harbiy kemalar va boshqa kuch-vositalardan foydalanilgan. AQSh harbiylari operatsiya mahalliy vaqt bilan soat 21:30 da yakunlanganini ma’lum qildi.
Shu bilan birga, Eron Islom inqilobi muhofizlari korpusi (IRGC) Hormuz bo‘g‘ozida mina qo‘yilgan dengiz yo‘lidan o‘tayotgan ikki neft tankeri portlab, yonishini da’vo qildi. Biroq CENTCOM bu ma’lumotni rad etib, uni "asossiz da’vo" deb atadi.
Eron davlat ommaviy axborot vositalari Yazd shahri, Qeshmi oroli va Hormuz bo‘g‘ozi yaqinida joylashgan Bandar Abbas porti atrofida portlash ovozlari eshitilgani haqida xabar qildi.
Iordaniya qurolli kuchlari esa bir kechada mamlakat havo hududiga uchirilgan 10 ta Eron raketasi yo‘q qilinganini bildirdi. Rasmiy ma’lumotlarga ko‘ra, hodisa oqibatida qurbonlar va vayronagarchilik kuzatilmagan.
Avvalroq Eron Quvayt, Bahrayn, Iordaniya va ilk bor Suriyadagi AQSh harbiy obyektlariga zarbalar berganini ma’lum qilgan edi. Vashington bu iddaolarni rad etdi.
Quvayt rasmiylari esa Eron dronlari hujumlari oqibatida bir nechta harbiy xizmatchi jarohatlanganini, elektr stansiyasi hamda suvni tuzsizlantirish inshootlariga zarar yetganini ma’lum qildi.
CBS News manbalariga ko‘ra, so‘nggi bir hafta davomida Iordaniyadagi ikki AQSh harbiy bazasiga qilingan hujumlarda bir nechta amerikalik harbiy xizmatchi jarohat olgan.
Shuningdek, Vashington Eronning AQSh zarbalari natijasida ko‘priklar, temir yo‘l vokzali va aeroport kabi fuqarolik infratuzilmasi nishonga olingani haqidagi bayonotlarini inkor etdi. Hormuzgon viloyati ma’muriyati esa hujumlar oqibatida yetti kishi halok bo‘lganini ma’lum qildi.
BBC Verify hamda BBC Persian tekshiruviga ko‘ra, Hormuzgon viloyatidagi Garive ko‘prigiga shikast yetgani tasdiqlangan. Kunduzi olingan suratlarda ko‘prikning bir qismi qulab tushgani va yo‘l vayron bo‘lganini ko‘rish mumkin.
Oq uy vakili BBC’ga bergan izohida AQSh "faqat harbiy nishonlar, jumladan harbiy logistika infratuzilmasi"ga zarbalar berganini ta’kidlagan.
