Toshkent shahri va viloyatining ayrim hududlaridagi issiqxona xo‘jaliklari uchun yer hamda mol-mulk solig‘ini oshirish taklif etilmoqda. Bu haqdagi qonun loyihasi 31 iyulgacha jamoatchilik muhokamasiga qo‘yilgan.
Loyihaga ko‘ra, Toshkent shahri, shuningdek, Yuqori Chirchiq, Qibray, Yangiyo‘l, Zangiota va Toshkent tumanlarida joylashgan issiqxonalar egallagan qishloq xo‘jaligi erlari uchun yer solig‘i amaldagi stavkaning 10 baravari miqdorida belgilanishi mumkin.
Shu bilan birga, isitish qozonxonalari olib tashlangan yoki elekt energiyasi orqali isitiladigan issiqxonalarga ushbu oshirilgan soliqlar tatbiq etilmaydi.
Yangi tartibdan maqsad — issiqxona xo‘jaliklarining atrof-muhitga ta’sirini kamaytirish va ekologik xavfsiz, energiya tejamkor texnologiyalardan foydalanishni rag‘batlantirish.
Shuningdek, zararli yoqilg‘ilardan foydalanadigan yangi issiqxona xo‘jaliklarini tashkil etishni cheklash va ekologik talablarga javob bermaydigan issiqxonalarni Surxondaryo viloyatidagi "Surxon-Agro" erkin iqtisodiy zonasiga bosqichma-bosqich ko‘chirish rejalashtirilgan.
