3 iyul kuni Xalqaro Press klubda yangi tuzilgan O`zbekiston Yoshlar Ittifoqi davlat tashkilotining faoliyatiga bag`ishlangan “O`zbekistonda yoshlar siyosati: dolzarb masalalarga zamonaviy yondoshuv mavzuida” sessiya bo`lib o`tgani haqida xabar bergandik.
Sessiya ishida kuni kecha Prezident tomonidan tayinlangan Xalq ta`limi vaziri o`rinbosari Alisher Sa`dullaev qatnashdi.
U o`z so`zini boshlar ekan Prezident tayinlagani uning uchun mutlaqo kutilmagan voqea bo`lganligini va ko`plab fikrlar va savollar kela boshlagani uchun o`zining ijtimoiy tarmoqlardagi akkauntini o`chirib tashlaganini ma`lum qildi.
Alisher qatnashchilarga oldiga juda ko`p maqsadlar qo`yganligini so`zlab berdi.
Alisher o`z nutqida Prezidentning ishonchini oqlashini va nasib qilsa bir yil o`tgach yana o`ziga o`xshagan ko`plab yoshlarga mana shunday vazifalar topshirilishi uchun qo`lidan kelgancha harakat qilishini va kerak bo`lsa 24 emas 25 soat ishlashini aytdi.
Sa`dullaev o`zining vazirlikdagi ilk kuni faoliyati haqida yig`ilganlarga quyidagilarni ma`lum qildi:
“Faoliyatimning ilk kuni xalq ta`limi tizimi 5 million bolani qamrab olganini, ulardan 4 millioni maktabgacha ta`lim muassasa bolalari qolgan bir millioni maktab o`quvchilari ekanligini bildim va shu sababdan asosiy e`tiborni bog`chalarga qaratish lozimligini tushunib etdim. Birinchi kunni o`zida meni Toshkentdagi eng yaxshi ko`rsatkichli va unchalik yaxshi bo`lmagan ko`rsatkichli maktabga olib borishlarini so`radim, hamda ularning farqlarini aniqlab, ko`rsatkichni ko`tarish yuzasidan takliflar ishlab chiqmoqchiman”, — deya qayd etdi u.
Alisher yaqin 100 kunlik faoliyati bilan bog`liq rejalari bilan o`rtoqlasharkan, birinchi galda bolalar bog`chalaridagi ahvolni o`rganish, yangi tizimlarni tatbiq etish, sharoitlar bilan bevosita tanishish maqsadida viloyatlarga safar qilishni rejalashtirganini aytdi.
