Nukus shahridagi ko`p qavatli uylar yo`laklariga suyuq gulqog`ozdan ishlangan suratlar ko`pchilikning e`tiborini tortmoqda.
Turli innovasion g`oyalari bilan e`tiborga tushayotgan nukuslik tadbirkor-ixtirochi Rashid Qartbaev endi chiqindi matolardan ham samarali foydalanish yo`lini topdi. Uning korxonasida aynan ko`p qavatli uylar yo`laklari uchun ishlatiladigan suyuq gulqog`oz tayyorlanmoqda.
Chiqindilarga ikkinchi hayot berish g`oyasi bilan yashayotgan R.Qartbaev korxonasi homiyligi hisobidan Nukus shahridagi “Temir yo`l” mahalla fuqarolar yig`ini hududidagi 22-kichik tuman 1.D uyning kirish yo`laklarini yangi ixtirosini qo`llagan holda, ta`mirdan chiqardi.
Muhimi, suyuq gulqog`ozlar bilan kirish yo`laklarini ta`mirlash ko`p qavatli uyda yashovchi aholi uchun ma`qul kelib, ancha arzonga tushmoqda.
«Oydin yo`l kommunal» shirkati raisi B.Berdiboevaning ta`kidlashicha, ko`p qavatli uylarning har bir pod`ezdi uchun 7 million so`m atrofida xarajat qilingan bo`lsa, suyuq gulqog`oz bilan ta`mirdan chiqarilgan yo`laklar uchun har biriga atigi 3 million 200 ming so`m kifoya qilgan.
– Hozir chiqindi deb tashlangan deyarli barcha narsalarga ikkinchi hayot bermoqdaman, – deydi tadbirkor Rashid Qartbaev. – Bu chiqindi matolar maxsus dastgohlarda maydalanadi va unga rang beriladi. Mahsulotimiz narxi arzon va sifatli bo`lgani bois bozori chaqqon. Eng asosiysi, atrof-muhit musaffoligiga hissa qo`shyapman.
Oldingi maqolalarimizda tadbirkorning polietilen chiqindilardan tomyopgich, bruschatka, quvur va boshqa narsalar ishlab chiqarayotgani, yaproqdan uy qurayotgani, parranda uchun tashlandiq suyaklardan un ishlab chiqarayotgani, 7 sotix erdan 70 tonna tarvuz etishtirish uchun tayyorgarlik ko`rayotgani haqida yozgan edik.
Shu o`rinda aytish kerakki, ixtirochi-tadbirkor Rashid Qartbaev chiqindilardan o`tgan yili 1 milliard 200 million so`m daromad ko`rgan.
Esimxon Qanaatov,
Qoraqalpog`iston axborot agentligi direktori