Ravshan Yaxshimurodov roppa-rosa 1 oy oldin Islom Karimov xotirasi uchun 1200 km yo`lni bosib o`tish istagi borligi haqida xabar qilgan edi.
Va`daga binoan 42 yoshli kompyuter ustasi Ravshan Yaxshimurodov o`zi yashab turgan joydan Samarqandgacha marafon uyushtirdi. 2018 yilning 30 aprel kuni yo`lga chiqqan sayyoh, bugun Samarqandga etib keldi. Erta tongda Islom Karimov maqbarasini ziyorat qildi.
— Birinchi Prezidentimizga hurmatim juda baland, uning xotirasiga hurmatimni izhor etishni xohladim. O`zim Beruniy tumanidagi Qishloq xo`jalik kasb-hunar kollejida texnik xodim bo`lib ishlayman. Mustaqilligimizning asoschisi Islom Karimovning barcha asarlarini o`qib chiqqanman. Endi Toshkentga borib, yurtboshimiz tahsil olgan ikkita oliy dargohga boraman, - deydi Ravshan Yaxshimurodov.
Ravshan Yaxshimurodov kuniga 72-75 km yo`l yurgan. O`zi bilan olib yurgan palatkani ochib, duch kelgan joyda tunab qolgan. Xorazm va Buxoro cho`llarini piyoda bosib o`tdi. Samarqandgacha 3 ta oyoq kiyimi yirtilgan.
Endilikda Ravshan Yaxshimurodov yo`l-yo`lakay ko`rgan-kechirganlarini, safar taasurotlarini kitob qilib yozishni niyat qilayapti.
Piyoda yurgan sayyoh Jizzaxga yo`l oldi. Poytaxtda esa sayohati yakunlanadi.
